ఓటీటీలో ఈ వారం వినోదాల సందడి.. కొత్త సినిమాలు, వెబ్‌సిరీస్‌లతో ప్రేక్షకులకు పండుగ!

ఈ వారం థియేటర్లలో పెద్ద సినిమాల విడుదలలు లేకపోయినా, ఓటీటీ వేదికలు మాత్రం కొత్త సినిమాలు, వెబ్‌సిరీస్‌లు, డాక్యుమెంటరీలతో ప్రేక్షకులను అలరించేందుకు సిద్ధమయ్యాయి. శుక్రవారం ఒక్కరోజే దాదాపు 15కు పైగా కొత్త చిత్రాలు, సిరీస్‌లు వివిధ ఓటీటీ ప్లాట్‌ఫార్మ్‌లలో స్ట్రీమింగ్‌కు రానుండటంతో వినోద ప్రియులకు ఈ వారాంతం ప్రత్యేకంగా మారింది. మరోవైపు థియేటర్లలో సూపర్ హిట్ చిత్రాలు ‘ఒక్కడు’, ‘సినిమా చూపిస్త మావ’ రీ-రిలీజ్ కానున్నాయి.
సినీ అభిమానులు ఎంతో ఆసక్తిగా ఎదురుచూస్తున్న ‘బాహుబలి: టార్చ్‌బేరర్’ డాక్యుమెంటరీ సిరీస్ ప్రస్తుతం నెట్‌ఫ్లిక్స్‌లో స్ట్రీమింగ్ అవుతోంది. దర్శకుడు ఎస్‌.ఎస్‌. రాజమౌళి రూపొందించిన ‘బాహుబలి’ చిత్రాల నిర్మాణ విశేషాలు, యుద్ధ సన్నివేశాల రూపకల్పన, నటీనటుల అనుభవాలు, తెరవెనుక కథనాలతో రూపొందిన ఈ నాలుగు భాగాల డాక్యుమెంటరీ విశేష ఆదరణ పొందుతోంది.
సువిక్షిత్‌, గీతికా రతన్ ప్రధాన పాత్రల్లో నటించిన ప్రేమకథా చిత్రం ‘దూరదర్శిని’ అమెజాన్ ప్రైమ్ వీడియోలో అందుబాటులోకి వచ్చింది. కార్తికేయ కొమ్మి దర్శకత్వం వహించిన ఈ చిత్రం ఓటీటీ ప్రేక్షకులను ఆకట్టుకునేలా రూపొందింది.
స్పోర్ట్స్ యాక్షన్ థ్రిల్లర్ అభిమానుల కోసం కథీర్‌, దివ్య భారతి, పూర్ణిమ రవి, రాధిక శరత్‌కుమార్ నటించిన ‘లింగం’ సిరీస్ జియో హాట్‌స్టార్‌లో ప్రసారమవుతోంది. ప్రశాంత్ పాండియన్ దర్శకత్వంలో రూపొందిన ఈ సిరీస్‌పై మంచి అంచనాలు ఉన్నాయి.
హారర్ కథలను ఆస్వాదించే ప్రేక్షకుల కోసం ‘ముత్తాశి’ థ్రిల్లర్ సిరీస్ జీ5లో విడుదలైంది. నందులాల్ ఎంఎస్ దర్శకత్వంలో రూపొందిన ఈ సిరీస్‌లో కేపీఏసీ లీల, అమిత్ చకాలక్కల్, అఖిలా భార్గవన్ ప్రధాన పాత్రలు పోషించారు.
ఇవే కాకుండా ‘మమ్ముట్టియాన్ స్టార్స్’ (జీ5), ‘అలియన్స్’ (అమెజాన్ ప్రైమ్ వీడియో), ‘ది బియర్ – సీజన్ 5’ (జియో హాట్‌స్టార్), ‘కొత్త కొత్తగా’, ‘ఛాయా చిత్రం’, ‘ది కేరళ కుట్టీ’ (ఈటీవీ విన్), ‘లిటిల్ బ్రదర్’, ‘నోట్స్ ఫ్రమ్ ది లాస్ట్ రో’, ‘ఏజెంట్ కిమ్ రీయాక్టివేటెడ్’ (నెట్‌ఫ్లిక్స్), ‘సేవేజ్ హౌస్’ (అమెజాన్ ప్రైమ్ వీడియో), ‘ఫర్‌బిడెన్ ఫ్రూట్స్’ (షడర్)తో పాటు ‘స్ట్రంగ్’, ‘అండర్ టోన్’ వంటి అంతర్జాతీయ కంటెంట్ కూడా ఈ వారం స్ట్రీమింగ్‌కు అందుబాటులోకి వచ్చింది.
యాక్షన్, హారర్, ప్రేమకథలు, థ్రిల్లర్లు, డాక్యుమెంటరీలు, వెబ్‌సిరీస్‌లు ఇలా అన్ని రకాల వినోదాత్మక కంటెంట్ ఒకేచోట లభిస్తుండటంతో ఈ వారాంతంలో ఓటీటీ వేదికలపైనే ప్రేక్షకుల దృష్టి ఎక్కువగా నిలవనుంది.