జయశంకర్‌ను కేసీఆర్ అవమానించారు: వీహెచ్ సంచలన ఆరోపణ

'తెలంగాణ కోసమే అన్నీ భరించా'ని జయశంకర్ చెప్పారని వెల్లడి

బతికుండగా అవమానం.. ఇప్పుడు దేవుడిలా కీర్తిస్తున్నారని బీఆర్ఎస్‌పై విమర్శలు

హైదరాబాద్, ఆగస్టు 6 (మన విశ్వం): తెలంగాణ సిద్ధాంతకర్త ప్రొఫెసర్ కొత్తపల్లి జయశంకర్ జయంతి సందర్భంగా మాజీ ఎంపీ వీ. హనుమంతరావు (వీహెచ్) చేసిన వ్యాఖ్యలు రాష్ట్ర రాజకీయాల్లో చర్చనీయాంశమయ్యాయి. ఒక సందర్భంలో తాను, కేసీఆర్, ప్రొఫెసర్ జయశంకర్ మాత్రమే కలిసి ఉన్న సమయంలో కేసీఆర్ జయశంకర్‌ను అవమానించేలా మాట్లాడారని వీహెచ్ ఆరోపించారు.
ఆ ఘటన అనంతరం జయశంకర్‌ను తాను ప్రశ్నించగా.. ఇలాంటి వ్యాఖ్యలు కొత్తేమీ కావని, తెలంగాణ రాష్ట్ర సాధన ఒక్కటే లక్ష్యంగా వాటిని భరిస్తున్నానని ఆయన తనతో చెప్పినట్లు వీహెచ్ వెల్లడించారు. తెలంగాణ కోసం వ్యక్తిగత అవమానాలను సైతం సహించాల్సి వచ్చిందని జయశంకర్ ఆవేదన వ్యక్తం చేశారని పేర్కొన్నారు. ఆలోచనలు తనవే అయినప్పటికీ వాటిని అమలు చేసే పరిస్థితి తనకు లేదని కూడా ఆయన చెప్పినట్లు వివరించారు.
ప్రొఫెసర్ జయశంకర్ తెలంగాణ రాష్ట్ర సాధనకే ప్రాధాన్యం ఇచ్చి, వ్యక్తిగత బాధలను పక్కనపెట్టారని వీహెచ్ అన్నారు. తెలంగాణ ఉద్యమ విజయమే తనకు ముఖ్యమని భావించి ఎన్నో సందర్భాల్లో మౌనంగా ఉన్నారని తెలిపారు.
బతికి ఉన్న సమయంలో జయశంకర్‌ను అవమానించిన వారే ఇప్పుడు ఆయనను దేవుడిలా కీర్తించడం ఆశ్చర్యకరమని వీహెచ్ బీఆర్ఎస్‌పై విమర్శలు గుప్పించారు. ఇది రాజకీయ అవసరాలకు అనుగుణంగా మారుతున్న వైఖరికి నిదర్శనమని ఆరోపించారు.
ప్రొఫెసర్ జయశంకర్ తెలంగాణ ఉద్యమానికి సిద్ధాంతపరమైన బలాన్ని అందించిన మహనీయుడని, ఆయన ఆశయాలను రాజకీయ ప్రయోజనాల కోసం కాకుండా నిజాయితీగా ఆచరించాల్సిన అవసరం ఉందని వీహెచ్ పేర్కొన్నారు.
అయితే వీ. హనుమంతరావు చేసిన ఈ ఆరోపణలపై బీఆర్ఎస్ నుంచి అధికారిక స్పందన రావాల్సి ఉంది.