సెప్టెంబరు 17 నుంచి ‘మల్లన్న’ పాదయాత్ర

హైదరాబాద్‌, ఆగస్టు 30 (మన విశ్వం): తెలంగాణలో బీసీల రాజ్యాధికారమే లక్ష్యంగా సెప్టెంబరు 17 నుంచి రాష్ట్రవ్యాప్తంగా పాదయాత్ర చేపట్టనున్నట్లు తెలంగాణ రాజ్యాధికార పార్టీ (టీఆర్పీ) అధినేత, ఎమ్మెల్సీ తీన్మార్‌ మల్లన్న ప్రకటించారు. రాష్ట్రంలోని 59 నియోజకవర్గాల్లో తమ రాజకీయ ‘సర్జికల్‌ స్ట్రైక్‌’ కొనసాగుతుందని చెప్పారు. ప్రతి గడపకూ వెళ్లి గత పాలకుల హయాంలో జరిగినట్లు తాము భావిస్తున్న దోపిడీ, బీసీలకు జరిగిన అన్యాయాలను వివరిస్తామని తెలిపారు. 2029లో తెలంగాణకు బీసీ ముఖ్యమంత్రి రావడమే తమ లక్ష్యమని స్పష్టం చేశారు.
తెలంగాణ రాజ్యాధికార పార్టీ కేంద్ర కార్యాలయంలో ఆదివారం మల్లన్న అధ్యక్షతన రాష్ట్ర కమిటీ సమావేశం జరిగింది. వర్కింగ్‌ ప్రెసిడెంట్‌ మాదం రజినీకుమార్‌ యాదవ్‌ సమావేశ ఎజెండాను ప్రవేశపెట్టారు. పార్టీ ఏర్పాటై సెప్టెంబరు 17 నాటికి ఏడాది పూర్తవుతున్న నేపథ్యంలో ప్లీనరీ నిర్వహించాలని రాష్ట్ర కమిటీ ఏకగ్రీవంగా నిర్ణయించింది.

‘మూడు పార్టీలను ఖాళీ చేస్తాం’

కాంగ్రెస్‌, బీఆర్ఎస్‌, బీజేపీలపై ప్రజల్లో నమ్మకం తగ్గిందని మల్లన్న వ్యాఖ్యానించారు. ఆ పార్టీలకు ప్రత్యామ్నాయ రాజకీయ శక్తిగా టీఆర్పీ ఎదుగుతోందన్నారు. రాబోయే రోజుల్లో మూడు పార్టీలను రాజకీయంగా ఖాళీ చేస్తామని, భవిష్యత్తులో తెలంగాణ రాజకీయాల్లో అవి కనిపించని పరిస్థితి వస్తుందని పేర్కొన్నారు. ‘‘రేవంత్‌రెడ్డే తెలంగాణకు చివరి ఓసీ ముఖ్యమంత్రి. 2029లో బీసీ ముఖ్యమంత్రి రావాలి. అందుకోసమే మా పోరాటం’’ అని చెప్పారు.

ఇంటింటికీ బీసీ రాజ్యాధికార నినాదం

పాదయాత్ర ద్వారా గ్రామగ్రామాన ప్రజలను కలుస్తామని, బీసీలకు జరిగిన రాజకీయ అన్యాయాలను ఇంటింటికీ తీసుకెళ్తామని మల్లన్న తెలిపారు. ఇది కేవలం రాజకీయ పోరాటం కాదని, బీసీల రాజ్యాధికారం కోసం చేపడుతున్న సామాజిక ఉద్యమమని పేర్కొన్నారు. బీసీలకు రాజకీయ, సామాజిక, ఆర్థిక సాధికారత దక్కే వరకు ఉద్యమాన్ని కొనసాగిస్తామన్నారు.
పాదయాత్ర ప్రారంభ స్థలం, మార్గరేఖ, పూర్తి కార్యాచరణపై సెప్టెంబరు 7న రాష్ట్రస్థాయి విస్తృత సమావేశం నిర్వహించి తుది నిర్ణయం తీసుకోనున్నట్లు పార్టీ తెలిపింది. ఇందుకోసం ప్రత్యేక కమిటీని ఏర్పాటు చేయనుంది. జిల్లా కమిటీల ఏర్పాటు 90 శాతం పూర్తయిందని, మండల, గ్రామస్థాయి కమిటీలను త్వరగా పూర్తి చేయాలని సమావేశంలో నిర్ణయించారు.
సమావేశంలో పార్టీ ప్రధాన కార్యదర్శులు, ఉపాధ్యక్షులు, అనుబంధ సంఘాల అధ్యక్షులు, రాష్ట్ర కార్యదర్శులు, ఇతర ముఖ్య నాయకులు పాల్గొన్నారు.